विराटनगर । विराटनगर नाका हुँदै स्रोत नखुलेको ठूलो परिमाणको नेपाली नगद भित्र्याउने प्रयासमा एक भारतीय नागरिक पक्राउ परेका छन् । प्रहरीका अनुसार विराटनगर महानगरपालिका–१७ क्षेत्रबाट भारत बिहार राज्यको फारबिसगन्ज निवासी ५५ वर्षीय नन्दलाल बाहेतीलाई ३ लाख ३ हजार १ सय रुपैयाँसहित नियन्त्रणमा लिइएको हो ।

जोगवनीबाट विराटनगरतर्फ आउँदै गरेका बाहेतीलाई अस्थायी प्रहरी पोस्ट मटेरुवाबाट खटिएको टोलीले शुक्रबार बिहान चेकजाँचका क्रममा पक्राउ गरेको मोरङ प्रहरी प्रवक्ता डीएसपी कोपिला चुँडालले जानकारी दिइन् । बाहेती भारतीय नम्बर प्लेट बीआर ३८ एए ८३०६ को स्कुटरमा सवार थिए ।

प्रहरीले शरीर खानतलासी गर्दा बाहेतीको पाइन्टको भित्री भागमा लुकाइछिपाइ राखिएको अवस्थामा नगद फेला पारेको जनाएको छ । बरामद रकममा एक हजार दरका ३ सय थान, पाँच सय दरका ४ थान र एक सय दरका ११ थान नोट रहेका छन् ।

बरामद रकमको स्रोत खुलाउन नसकेपछि बाहेतीलाई स्कुटर र नगदसहित इलाका प्रहरी कार्यालय रानीमा राखी थप अनुसन्धान भइरहेको छ । प्रहरीका अनुसार प्रारम्भिक अनुसन्धानमा उक्त रकम अवैध हुण्डी कारोबारसँग सम्बन्धित हुन सक्ने आशंका गरिएको छ ।

मोरङ प्रहरीले पछिल्लो समय सीमा नाकाबाट हुने अवैध नगद ओसारपसार र हुण्डी कारोबारमाथि निगरानी कडा बनाएको जनाएको छ । घटनाबारे थप अनुसन्धानपछि आवश्यक कानुनी प्रक्रिया अघि बढाइने प्रहरीको भनाइ छ ।