विराटनगर । विराटनगर–११ मा अवस्थित नेपाल बिजनेस कलेजले नयाँ शैक्षिक सत्रका लागि भर्ना भएका ३५० भन्दा बढी विद्यार्थीलाई औपचारिक कार्यक्रम आयोजना गरी स्वागत गरेको छ। आइतबार सम्पन्न कार्यक्रममा एमबीए, बीबीए, बिआइटी र बीएचएम तहमा भर्ना भएका विद्यार्थीहरू सहभागी थिए।

कार्यक्रममा कलेजका सिनियर विद्यार्थीहरूले नयाँ विद्यार्थीलाई स्वागत गर्दै शैक्षिक यात्रामा सहकार्य र नेतृत्व विकासको सन्देश दिएका थिए। समारोहका प्रमुख अतिथि तथा कलेजका संस्थापक अध्यक्ष भेषप्रसाद धमलाले शिक्षालाई केवल सैद्धान्तिक सीमामा सीमित नगरी व्यावहारिक र सीपमूलक बनाउन कलेज प्रतिबद्ध रहेको बताए। उनले प्रतिस्पर्धी बजारमा टिक्न सक्ने जनशक्ति उत्पादनमा कलेजले प्राथमिकता दिएको उल्लेख गरे।

स्वागत कार्यक्रमअन्तर्गत विद्यार्थीहरूले नृत्य, गायन तथा फेसन शोमार्फत आफ्नो प्रतिभा प्रस्तुत गरेका थिए। कार्यक्रमको सम्पूर्ण व्यवस्थापन विद्यार्थी स्वयंले गरेको कलेजले जनाएको छ। कलेजका निर्देशक दीपक कोइरालाका अनुसार यस्ता ‘मेगा इभेन्ट’ हरू विद्यार्थीको नेतृत्व क्षमता, व्यवस्थापन सीप र व्यवहारिक अनुभव अभिवृद्धि गर्ने उद्देश्यले आयोजना गरिँदै आएका छन्। “सातौँ सेमेस्टरका विद्यार्थीले अनिवार्य रूपमा यस्ता कार्यक्रम आयोजना गर्नुपर्छ र यसको मूल्यांकन शैक्षिक अंकसँग जोडिएको हुन्छ,” उनले भने।

सन् २०१४ देखि सञ्चालनमा आएको नेपाल बिजनेस कलेजबाट हालसम्म ३०० भन्दा बढी विद्यार्थी स्नातक भइसकेका छन्। हाल एमबीए तहमा नवौँ ब्याच अध्ययनरत छ। कलेजका अनुसार उत्तीर्ण विद्यार्थीमध्ये करिब ७० प्रतिशतले स्वदेशमै रोजगारी पाएका छन् भने केही विद्यार्थी उच्च शिक्षा तथा रोजगारीका लागि विदेश गएका छन्।

पढाइसँगै अतिरिक्त क्रियाकलाप र सीप विकासलाई प्राथमिकतामा राख्दै आएको यस कलेजले विराटनगरमा व्यवसायिक शिक्षाको क्षेत्रमा फरक पहिचान बनाउँदै आएको छ।