विराटनगर । नेपाल राष्ट्रिय व्यवसायी महासंघका संस्थापक अध्यक्ष नरेश कटुवालले उद्योग क्षेत्रप्रति राज्यको गम्भीर बेवास्ताका कारण दिनप्रतिदिन उद्योगहरू धरासायी बन्दै गएको बताएका छन्। नेपालका जुत्ताचप्पल उद्योगीहरुको छाता संस्थाका रुपमा रहेको यस संघको १२ औँ साधारणसभा तथा छैठौं महाधिवेशनमा उनले यस्तो बताएका हुन् ।

उद्योग क्षेत्रप्रति आम नागरिक मात्र होइन, नीतिनिर्मातामै रुचि घट्दै गएको उल्लेख गर्दै उनले भने, “आज मुलुकमा उद्योग भन्ने कुरा मान्छेलाई एकादेशको नमनपर्ने कथाजस्तो, घिन लाग्ने ठाउँजस्तो बनेको छ। उद्योगप्रति एलर्जी नै हुन थालेको छ।”

कटुवालले जुत्ता–चप्पल उद्योगलाई उदाहरणका रूपमा प्रस्तुत गर्दै स्वदेशमै कच्चा पदार्थको उत्खनन गरी आत्मनिर्भर बन्न सकिने सम्भावना हुँदाहुँदै पनि राज्यले आवश्यक ध्यान नदिएको बताए ।

“हामी लामो समयदेखि जुत्ता–चप्पल क्षेत्रमा आवश्यक कच्चा पदार्थ यहीँ उत्खनन गर्नुपर्छ, यही क्षेत्रलाई आत्मनिर्भर बनाउनुपर्छ भनेर लागिरहेका छौं,” उनले भने, “केही प्रतिशतसम्म आत्मनिर्भर हुन सफल पनि भएका छौं। क्वालिटी र क्वान्टिटी दुवै दिन सकेका छौं र भारत–चीनबाट आएका जुत्तालाई केही हदसम्म विस्थापित गर्न सफल भएका छौं।”

उद्योग र व्यवसाय जोगाउन आफूहरू हरेक कालखण्डमा संघर्ष गर्दै आएको उल्लेख गर्दै कटुवालले भने, “हामी लड्दै–मर्दै भए पनि उद्योग बचाउनुपर्छ, अर्थतन्त्र जोगाउन केही गर्नुपर्छ भनेर लागिरहेका छौं। आज पनि लागिरहेका छौं, भोलि पनि लागिरहन्छौं। तर भोलिको कुनै आश देखिँदैन।”

आगामी चुनावप्रति संकेत गर्दै उनले २७५ जना जनप्रतिनिधिको भविष्यसँगै मुलुकको भविष्य जोडिएको भए पनि परिवर्तनको स्पष्ट संकेत नदेखिएको बताए। “चुनावमा होमिएका २७५ जनाले भविष्य बनाउने हो, तर फेरि पनि केही हुनेवाला छैन,” उनले भने।

उनले उद्योग मन्त्रालय र अर्थ मन्त्रालय नेतृत्वमा पुगेका व्यक्तिहरूमाथि पनि कडा टिप्पणी गरे। “कहाँबाट हावा भरमा आएर उद्योगमन्त्री, अर्थमन्त्री बनेका छन्। ज्ञान हुनुपर्छ, ज्ञान भएका मान्छेलाई मात्र निर्णय गर्ने तजबिज हुन्छ,” उनले भने। आफूहरूले दिएका ज्ञापनपत्रहरू कार्यान्वयन हुनुको साटो टोकरीमा फाल्ने काम मात्र भएको उनको भनाई छ।

चुनावी गतिविधिप्रति व्यंग्य गर्दै कटुवालले भने, “काठमाडौंमा जाडोमा बसेर रमझम गर्दै, भाले–खसी खाएर, घुमेर फोटो खिचेर, टिकटक बनाएर क्यामरा बोकेर भोट माग्न तल जानेहरूका लागि अहिले दशैं आएको जस्तो भएको छ।”

अन्त्यमा उनले उद्योगी–व्यवसायीलाई आपसी एकताबद्ध हुन आह्वान गरे। “माथिल्लो तहका छाता संगठनहरूले हठ छोडेर सबैलाई एकढिक्का बनाएर हाम्रा मुद्दा व्यवस्थित रूपमा अघि बढाउनुपर्छ,” उनले भने।