विराटनगर ÷ केही दिनदेखि निरन्तर रुपमा गिरावट भईरहेको शेयर बजार मापक नेप्से परिसूचक सोमबार २५.४१ अंकले सुधार देखिएको छ ।
आज दिनभरी उतार चढावका बीच नेप्से परिसूचक २५.४१ अंकले वृद्धि भएर २ हजार ७ सय १८.५१ अंक पुगेको छ । आइतबार नेप्से परिसूचक ३९.४ अंकले घटेर २ हजार ६९३.१० अंकमा झरेको थियो । आज कारोबारमा आएका २२४ कम्पनीको ४९ लाख ९२ हजार ८८७ कित्ता शेयर २ अर्ब ९९ करोड ७६ लाख ७१ हजार ७२.२१ रुपैयाँ बराबरको कारोबार भएको छ । आइतबारको तुलनामा कारोबार रकममा भने धेरै कमी आएको छ ।

सोमबार शेयर बजार दोहोरो अंकले बढ्दा युनाइटेड आईडीआई मार्दी आर्वी हाइड्रोपावर कम्पनीको शेयर मूल्य सर्किट लेभलमा कारोबार भएको छ । गुँरास लघुवित्त लिमिटेडको शेयरमूल्य ९ प्रतिशत भन्दा बढिमा कारोबार भएको छ । त्यस्तै नेपाल हाइड्रोविन डेभलपर कम्पनीको शेयर मूल्य ७ प्रतिशत र बुद्धभूमि नेपाल हाइड्रोपावर र साहस उर्जा लिमिटेडको ६ प्रतिशत भन्दा बढिमा कारोबार भएको छ ।

त्यस्तै, सेन्सेटिभ इण्डेक्स १ प्रतिशत, फ्लोट इण्डेक्स ०.९३ प्रतिशत र सेन्सेटिभ फ्लोट इण्डेक्स ०.९१ प्रतिशत वृद्धि भएको छ । सोमबार १३ वटै उपसमूहको परिसूचकमा हरियाली छाएको छ । आज सबैभन्दा बढी २६ करोड ५० लाख १३ हजार ५६० रुपैयाँ नेपाल टेलिकमको कारोबार भएको छ । कारोबारकै आधारमा दोस्रो स्थानमा रहेको जीवन बिकास लघुवित्त कम्पनीको २६ करोड ३ लाख २३ हजार ८४५ रुपैयाँ बराबरको शेयर खरिदबिक्री भएको छ ।