विराटनगर । विराटनगर महानगरपालिकाको आयोजनामा आधारभूत तहका विद्यार्थीलाई लक्षित गर्दै अन्तरविद्यालय लोकनृत्य प्रतियोगिता सम्पन्न भएको छ । श्री माध्यमिक विद्यालय कञ्चनबारीको संयोजनमा कक्षा ६ देखि ८ सम्मका विद्यार्थीबीच दुई दिनसम्म प्रतियोगिता सञ्चालन गरिएको हो ।

प्रतियोगिताको पहिलो दिन महानगर क्षेत्रभित्रका सामुदायिक विद्यालयबीच प्रतिस्पर्धा गराइएको थियो । यस चरणमा २६ विद्यालय सहभागी भएका थिए । प्रतिस्पर्धाबाट उत्कृष्ट ६ विद्यालय अन्तिम चरणका लागि छनोट भए । प्रारम्भिक चरणको मूल्यांकनअनुसार पोखरिया माध्यमिक विद्यालय पहिलो, गोग्राहा माध्यमिक विद्यालय दोस्रो र जनता बाल आधारभूत विद्यालय तेस्रो स्थानमा रहे । सत्यनारायण आधारभूत विद्यालय, मदननगर आधारभूत विद्यालय र आयोजक विद्यालय कञ्चनबारी पनि दोस्रो चरणमा प्रवेश गरेका थिए ।

दोस्रो दिन संस्थागत विद्यालयतर्फबाट छनोट भएर आएका ६ विद्यालय र सामुदायिक विद्यालयबाट आएका ६ विद्यालयबीच अन्तिम प्रतिस्पर्धा गराइएको थियो । अन्तिम नतिजाअनुसार मदननगर आधारभूत विद्यालय पहिलो, जनता बाल आधारभूत विद्यालय विराटनगर–१४ दोस्रो, कान्तिपुर माध्यमिक विद्यालय तेस्रो र पोलस्टार बोर्डिङ स्कुल चौथो स्थानमा रहन सफल भए ।

विजेता विद्यालयलाई क्रमशः २५ हजार, २० हजार, १५ हजार र ३ हजार रुपैयाँ नगदसहित ट्रफी, मेडल र प्रमाणपत्र प्रदान गरिएको आयोजकले जनाएको छ ।

प्रतियोगिता पछिल्ला तीन वर्षदेखि निरन्तर आयोजना हुँदै आएको छ । लोकसंस्कृतिको प्रवर्द्धन, विद्यार्थीमा अन्तरनिहित प्रतिभाको पहिचान तथा सामुदायिक र संस्थागत विद्यालयबीच आपसी सहकार्य अभिवृद्धि गर्ने उद्देश्यले प्रतियोगिता आयोजना गरिएको महानगरपालिकाको भनाइ छ ।

कार्यक्रममा ३५० भन्दा बढी विद्यार्थीले विभिन्न जातजातिका लोकनृत्य प्रस्तुत गरेका थिए । प्रतियोगिताको उद्घाटन महानगर प्रमुख नागेश कोइरालाले गरेका थिएने भने सामाजिक विकास समितिका संयोजक काजीबहादुर बस्नेतले विजेता विद्यालयलाई पुरस्कार तथा प्रमाणपत्र वितरण गरेका थिए ।