विराटनगर । बंगलादेशमा बिहीबार सम्पन्न प्रतिनिधिसभा निर्वाचनमा बंगलादेश नेसनलिस्ट पार्टी बीएनपीले स्पष्ट बहुमत हासिल गरेको दाबी गरेको छ । प्रारम्भिक परिणामअनुसार बीएनपी एक्लैले सरकार गठन गर्ने स्थितिमा पुगेको छ भने पार्टी अध्यक्ष तारिक रहमान प्रधानमन्त्री बन्ने लगभग निश्चित देखिएको छ।

कुल ३०० संसदीय सिटमध्ये २९९ सिटमा मतदान भएको थियो । शेरपुर–३ निर्वाचन क्षेत्रमा एक उम्मेदवारको निधन भएपछि त्यहाँ मतदान स्थगित गरिएको निर्वाचन आयोगले जनाएको छ। सार्वजनिक प्रारम्भिक नतिजाअनुसार २९९ सिटमध्ये २०६ सिटको परिणाम आउँदा बीएनपीले १६५ सिट जितेको छ। केही अन्तर्राष्ट्रिय सञ्चारमाध्यमहरूले बीएनपी र उसका सहयोगीहरूले २११ सिटसम्म जितेको उल्लेख गरेका छन्। अन्य दल र स्वतन्त्र उम्मेदवारहरूले सीमित सिटमा विजय हासिल गरेका छन्।

जमात–ए–इस्लामीको नेतृत्वमा रहेको ११ दलीय गठबन्धनले हालसम्म करिब ४५ देखि ७० सिटसम्म जितेको जनाइएको छ। गठबन्धनका तर्फबाट ढाका–१५ मा शफीकुर रहमान विजयी भएका छन्। यद्यपि सिट संख्या कम भए पनि उल्लेख्य मत प्रतिशत प्राप्त गरेको खण्डमा उक्त गठबन्धन संसद्मा बलियो प्रतिपक्षको भूमिकामा देखिन सक्ने विश्लेषण गरिएको छ।

दुई दशकपछि बीएनपीको सत्तामा पुनरागमन

करीब दुई दशकदेखि सत्ताबाहिर रहेको बीएनपीका लागि यो निर्वाचन निर्णायक सावित भएको छ। पार्टीले दुई तिहाइभन्दा बढी बहुमत आउने अपेक्षा व्यक्त गर्दै आएको थियो। मतदानपछि अध्यक्ष तारिक रहमानले कानुन–व्यवस्था सुदृढीकरण, आर्थिक सुधार र संस्थागत स्थायित्वलाई पहिलो प्राथमिकता दिने बताएका थिए।

बंगलादेशले ‘पहिले आउनेले जित्ने’ निर्वाचन प्रणाली ९फस्र्ट–पास्ट–द–पोस्ट० अपनाउँदै आएको छ। यस प्रणालीमा उम्मेदवारले आफ्नो निकटतम प्रतिस्पर्धीभन्दा बढी मत ल्याएमा विजयी घोषित हुने व्यवस्था छ, पूर्ण बहुमत आवश्यक पर्दैन।

तारिक रहमानको राजनीतिक पुनरागमन

पूर्वप्रधानमन्त्री बेगम खालिदा जियाका पुत्र तथा बीएनपी अध्यक्ष तारिक रहमान गत डिसेम्बरमा करिब १७ वर्षपछि स्वदेश फर्किएका थिए। उनी दुई निर्वाचन क्षेत्रमा उम्मेदवार बनेका थिए र दुवै क्षेत्रमा विजयी भएका छन्। स्वदेश फर्किएको केही समयपछि उनकी आमा खालिदा जियाको निधन भएपछि पार्टीको सम्पूर्ण नेतृत्व उनको हातमा केन्द्रित भएको हो।

सन् २००१–२००६ को बीएनपी शासनकालमा उनीमाथि भ्रष्टाचारका आरोप लागेको थियो। सन् २००७ मा अन्तरिम सरकारको समयमा उनी करिब १८ महिना जेल बसेका थिए। त्यसपछि उपचारका लागि विदेश जाने अनुमति पाएर बेलायत पुगेका उनी लामो समय स्वदेश फर्किएका थिएनन्। विदेशमै रहँदा पनि पार्टीको रणनीति र आन्दोलनमा उनको प्रभाव कायम रहेको विश्लेषण हुँदै आएको थियो।