विराटनगर । विराटनगरस्थित मोर्डनएरा स्कुलले आफ्नो स्थापनाको २५ औँ वर्ष पुगेको अवसरमा ‘रजत जयन्ती’ तथा अभिभावक दिवसको पहिलो सत्र सम्पन्न गरेको छ । स्कुलले आज देखि विद्यालय परिसरमा दुई दिने विशेष कार्यक्रम आयोजना गरी रजत जयन्ती मनाउन सुरु गरिएको हो।

रजत जयन्तीको उद्घाटन विराटनगर महानगरपालिकाका प्रमुख नागेश कोइरालाले गरेका थिए । कार्यक्रमलाई सम्बोधन गर्दै प्रमुख कोइरालाले अबको शिक्षा गुणस्तरीय मात्र नभई रोजगारमुखी हुनुपर्नेमा जोड दिए ।

विद्यालयका प्रिन्सिपल इन्द्र राईले मोर्डनएराले विद्यार्थीहरूलाई गुणस्तरीय शिक्षाका साथै सीप र संस्कारसहितको व्यावहारिक ज्ञान प्रदान गर्दै आएको बताए ।

विद्यालयमा हाल नर्सरीदेखि कक्षा १० सम्म ९५० जना र कलेजतर्फ ३५० जना गरी कुल १ हजार ३ सयभन्दा बढी विद्यार्थीहरू अध्ययनरत् छन्। विद्यालय मन्टेश्वरी पद्धतिबाट सञ्चालन गरिएको र विद्यार्थीहरुको चौतर्फी विकासका ध्यान दिईरहेको विद्यालयले बताएको छ ।

रजत जयन्तीको पहिलो दिन विद्यार्थीहरूले आकर्षक नृत्य, गीत र कविता वाचन प्रस्तुत गरेका थिए। रजत जयन्ती तथा अभिभावक दिवसको समापन भोली गरिने विद्यालय प्रशासनले जनाएको छ।