विराटनगर । वीरेन्द्रनगरस्थित निर्माणाधीन प्रदेश रंगशालाको वातावरणीय प्रभाव मूल्यांकन ईआईए प्रतिवेदन नै स्वीकृत नगराएको खुलेको छ । कर्णाली प्रदेश
खेलकुद परिषद्ले सम्बन्धित प्रदेश मन्त्रालयबाट ईआईए स्वीकृत नगराई काम अघि बढाएको हो ।

कर्णाली प्रदेशको राजधानी वीरेन्द्रनगरमा निर्माणाधीन प्रदेश रंगशाला । तस्बिर स् हरिहरसिंह राठौररकान्तिपुर
प्रदेशको उद्योग, पर्यटन, वन तथा वातावरण मन्त्रालयले ईआईए स्वीकृत नै नगरी काम गरेको पाइएपछि खेलकुद परिषद्लाई गत फागुन ११ मा जरिवाना तोक्दै पत्राचार गरेको थियो । परिषद्ले रंगशाला निर्माणमा क्षेत्रगत सर्त सूची टीओआर प्रतिवेदन लाई वातावरणीय प्रभाव मूल्यांकन प्रतिवेदन ईआईए भन्दै झूटो विवरण पेस गरी काम अगाडि बढाएको पाइएपछि मन्त्रालयले प्रदेश वातावरण संरक्षण ऐन २०७७ को दफा ३४ ९ग० बमोजिम १० हजार जरिवाना तोकेको थियो । विवाद भएपछि परिषद्ले जरिवाना तिरेर कामलाई निरन्तरता दिएको छ ।

ईआईए प्रतिवेदन पूरा गरी वन मन्त्रालयबाट स्वीकृति लिएर मात्र निर्माण सुरु गर्नुपर्नेमा कानुनविपरीत अगाडि बढेको निष्कर्षमा मन्त्रालय पुगेको हो । परिषद्ले २०७८ भदौ १८ मा मन्त्रालयमा बुझाएको टीओआर प्रतिवेदनलाई ईआईए बताएको थियो । जबकी ईआईए गर्नुपूर्व त्यसको टीओआर निर्धारण गरी स्वीकृति लिनुपर्छ । प्रदेश वातावरण संरक्षण ऐनमा प्रदेश सरकारका प्राथमिकता प्राप्त विकास आयोजना, प्रदेश गौरवका आयोजना, औद्योगिक प्रतिष्ठानलगायत क्षेत्रमा निर्माण सुरु हुनुपूर्व वातावरणीय प्रभाव मूल्यांकन गरी स्वीकृति लिनुपर्ने व्यवस्था छ । सोहीबमोजिम ईआईए प्रतिवेदन मन्त्रालयमा पेस भएको ३० दिनभित्र स्वीकृति दिने वा नदिने निर्णय भइसक्नुपर्छ ।

सामाजिक विकास मन्त्रालयले रंगशालाको ईआईए रिपोर्ट गत असार २८ मा पठाएको र वन मन्त्रालयले कानुनले तोकेको समय सीमाभित्र अध्ययन गरी जवाफ मागेकोमा परिषद्बाट पुस ६ मो अन्तिम जवाफ आएपछि ईआईए प्रतिवेदन पारित हुने अवस्थामा पुगेको थियो । परिषद्ले सामाजिक विकास मन्त्रालय हुँदै गत पुस ६ मा वन मन्त्रालयमा अन्तिम प्रतिवेदन पेस गरेको थियो । मन्त्रालयले सर्वसाधारणको जानकारीका लागि थप राय सुझाव लिन ७ दिनको समय दिएर गत पुस १८ मा मन्त्रालयको वेबसाइटमा राखेको थियो । त्यसपछि माघ २९ मा ईआईए प्रतिवेदन पारित गरेको थियो । जब कि रंगशालाको निर्माण २०७८ मंसिरमा सुरु भइसकेको थियो ।

वीरेन्द्रगर–८ स्थित निर्माणाधीन रंगशालाको झन्डै ३० प्रतिशत काम सम्पन्न भइसकेको छ । २०८१ जेठ ११ भित्र निर्माण सम्पन्न गरिसक्ने कार्यादेशसहित १ अर्ब ५९ करोड ४७ लाख रुपैयाँ लागतमा एमएसीरजीएसएल कम्पनीले ठेक्का पाएको छ । १० हजार दर्शक अट्ने क्षमताको रंगशाला पौडी पोखरी, भलिबललगायतका इन्डोर खेलको सुविधासहित अत्याधुनिक प्रविधिमा निर्माण भइरहेको हो ।