विराटनगर । विराटनगर महानगरपालिका–८, मधुमारास्थित नमुना विद्या मन्दिरले २०८० सालको माध्यमिक शिक्षा परीक्षा (एसईई) मा आफ्नो विद्यालयबाट सहभागी हुने कक्षा १० को अध्ययन पूरा गरेका विद्यार्थीहरूलाई बिदाइ गरेको छ ।

विद्यालयले शुक्रबार एक कार्यक्रम आयोजना गरी यस वर्षको एसईईमा सहभागी हुने आफ्ना ४५ जना विद्यार्थीहरूलाई शुभकामनासहित बिदाइ गरेको हो ।

कक्षा ९ का विद्यार्थीहरूको आयोजनामा भएको बिदाइ कार्यक्रममा विद्यालयका प्रधानाध्यापक शिवप्रसाद अधिकारीसहित शिक्षक–शिक्षिकाहरूले अबीर र खादा लगाइदिएर विद्यार्थीहरूलाई बिदाइ गरेका थिए ।

सो अवसरमा विद्यालयले बिदाइ भएका सबै विद्यार्थीहरूलाई सम्झनास्वरूप मायाको चिनो प्रदान गरेको थियो भने बिदाइ भएका विद्यार्थीहरूले पनि सम्मानस्वरूप शिक्षक–शिक्षिकाहरूलाई मायाको चिनो प्रदान गरेका थिए ।

कार्यक्रममा बोल्दै प्रधनाध्यापक अधिकारीले विद्यार्थीहरूले हासिल गर्ने उपलब्धि विद्यालयको पनि उपलब्धि हुने भन्दै बिदाइ भएका विद्यार्थीहरूलाई एसईईमा उत्कृष्ट नतिजा तथा उज्ज्वल शैक्षिक भविष्यका लागि शुभकामना दिएका थिए ।

२०५० सालमा स्थापना भएर शैक्षिक सत्र २०७९ सम्म कक्षा १० सम्म पढाइ हुँदै आएको नमुना विद्या मन्दिरमा शैक्षिक सत्र २०८० देखि भने कक्षा ११ र १२ मा पनि व्यवस्थापन संकाय पढाइ भइरहेको छ । विद्यालयले गुणात्मक र व्यावहारिक शिक्षामा विशेष जोड दिँदै आइरहेको छ ।