दोहोरो अकंले बढ्यो शेयर बजार
काठमाडौं। बिहीवार शेयर बजार दोहोरो अंकले बढेको छ । शेयर बजार १४.१७ अंकले बढेर २७२६.७२ बिन्दुमा कायम भएको छ । शेयर बजारमा १५३ कम्पनीको शेयर मूल्य बढेको छ भने १११ कम्पनीको शेयर मूल्य घटेको...
विराटनगर । यही चैत १५ देखि २४ गतेसम्म विराटनगरमा आयोजना हुने ‘विराट गोल्डकप’ को आठौं संस्करणको तयारी अन्तिम चरणमा पुगेको छ । आयोजक विराट गोल्डकप फुटबल ट्रष्टले मंगलबार शहीद रंगशालामा पत्रकार सम्मेलन गरेर प्रतियोगिताको तयारी अन्तिम चरणमा पुगेको र बाँकी तयारीका काम धमाधम भइरहेको जानकारी दिएको हो ।
विराट गोल्डकप फुटबल ट्रष्टका अध्यक्ष किशोरबहादुर शाहीका अनुसार विगतका वर्षहरूमा ट्रष्टको कार्यसमितिले संयोजक राखी गर्दै आएको प्रतियोगिता यस वर्ष ट्रष्टको कार्यसमितिले आफैं गर्ने भएको हो ।
‘हाम्रो सान, विराटनगरको पहिचान : विराट गोल्डकप’ भन्ने नाराका साथ हुने प्रतियोगिता सञ्चालनका लागि शहीद रंगशालाको मैदान मर्मत र सरसफाइ, रंगशालाको भित्र-बाहिर ब्यानर तथा होर्डिङ बोर्ड निर्माणलगायतका काम भइरहेको अध्यक्ष शाहीले जानकारी दिए ।
प्रतियोगितामा भाग लिने १० वटा फुटबल टिम यसअघि नै छनोट भइसकेका छन् । जसमा भारतबाट २, भुटानबाट १ र नेपालबाट विभागीय टिमहरूसहित ७ टिम छन् ।
प्रतियोगितामा भारतबाट साउथर्न समिति फुटबल क्लब कोलकाता, सिक्किम ड्रागन फुटबल क्लब सिक्किम तथा भुटानबाट आरटीसी फुटबल क्लब, थिम्पु सहभागी हुने छन् ।
यस्तै नेपाली टिमतर्फ नेपाल पुलिस क्लब, त्रिभुवन आर्मी फुटबल क्लब, मच्छिन्द्र फुटबल क्लब, एनआरटी क्लब, एपीएफ फुटबल क्लब, चर्ज ब्वाइज फुटबल क्लब र सांग्रिला मोरङ एफएको सहभागिता रहने छ ।
प्रतियोगिताका लागि धेरै प्रायोजकहरूको टुंगो लागिसकेको र केही टुंगो लाग्न बाँकी रहेको पत्रकार सम्मेलनमा जानकारी दिइयो ।
मैदानमा प्राथमिक उपचारका लागि न्यूरो हस्पिटलसँग सम्झौता भएको र यस प्रतियोगिताको बैकिङ पार्टनर ग्लोबल आईएमई बैंक रहेको अध्यक्ष शाहीले बताए ।
प्रतियोगिताको संरक्षकमा कोशी प्रदेश, विराटनगर महानगरपालिका, राष्ट्रिय खेलकुद परिषद् र अखिल नेपाल फुटबल संघ रहेका छन् ।
प्रतियोगिता सञ्चालनका लागि १ करोड १८ लाख ४३ हजार २ सय रूपैयाँ खर्च हुने अनुमान गरिएको छ ।
प्रतियोगिताको विजेतालाई नगद ११ लाख रूपैयाँ तथा उपविजेतालाई नगद ५ लाख ५० हजार रूपैयाँ पुरस्कार प्रदान गरिने छ ।
त्यसैगरी उत्कृष्ट प्रशिक्षकलाई नगद २१ हजार रूपैयाँ, उत्कृष्ट गोलरक्षक र सर्वाधिक गोलकर्तालाई जनही नगद २१ हजार रूपैयाँ पुरस्कार दिइने छ । यस्तै दैनिक हुने खेलको उत्कृष्ट खेलाडीले नगद ११ हजार रूपैयाँ र सर्वोकृष्ट खेलाडीले मोटरसाइकल पुरस्कार पाउने आयोजकले जनाएको छ ।
राष्ट्रियडेली कोशी प्रदेशका सक्रिय युवाहरूको टिमले सञ्चालन गर्दैआएको अनलाइन पोर्टल हो । समाजका सही घटनाहरूलाई आम-समुदायमाझ पुर्याउनु र राज्यलाई खबरदारी गर्नु हाम्रो उद्देश्य हो । राष्ट्रियडेली अनलाइन आर्थिक मिडिया सञ्चालक संघ नेपाल (इमान) को सदस्य संस्था हो ।