विराटनगर । मार्टस मेमोरियल स्कूलले यस वर्ष ‘स्वस्थ र मर्यादित होली’ को सन्देशसहित रंगहरूको पर्व होली आज एक कार्यक्रमका विच उल्लासमय मनाएको छ ।
विद्यालय परिसरमा आयोजित कार्यक्रममा विद्यार्थी, शिक्षक–शिक्षिकाहरुले सभ्य र संस्कृतिमैत्री होलीमनाएका छन् ।

विद्यालयका संस्थापक सीएम श्रेष्ठले होली केवल रंग खेल्ने अवसर नभई आपसी सद्भाव, सहिष्णुता र सामाजिक एकताको भाव सुदृढ गर्ने सांस्कृतिक पर्व भएको उल्लेख गरे । समाजमा बढ्दो असभ्य र जबर्जस्तीपूर्ण गतिविधिप्रति चिन्ता व्यक्त गर्दै उनले विद्यालयले सुरक्षित, अनुशासित र संस्कृतिमैत्री वातावरणमा होली मनाउने अभ्यासलाई प्राथमिकता दिएको बताए ।

कार्यक्रममा विद्यार्थीहरूले खुसी र उमंगका साथ रंग, अबिर तथा प्राकृतिक सामग्री प्रयोग गर्दै संयमित ढंगले होली खेलेका थिए । साना बालबालिकालाई होलीको सांस्कृतिक, धार्मिक र सामाजिक महत्वबारे जानकारी गराइनुका साथै सचेतनामूलक प्रस्तुतिमार्फत जिम्मेवार आचरणको सन्देश प्रवाह गरिएको थियो ।

विद्यार्थीसँगै कार्यक्रममा विद्यालयका प्रिन्सिपल विजय डाँगी, को अर्डिनेटर नारायण स्वर्णकार, शिक्षक दिनेश ढकाललगायतका शिक्षक–शिक्षिकाले पनि आपसमा रंग लगाएर शुभकामना आदान प्रदान गरेका थिए ।

गीत–संगीत र नृत्य प्रस्तुतिसँगै ‘पानीको दुरुपयोग नगर्ने, जबर्जस्ती रंग नदल्ने र वातावरणमैत्री सामग्री प्रयोग गर्ने’ प्रतिबद्धता सार्वजनिक गरिएको विद्यालयले जनाएको छ । शिक्षक–शिक्षिकाले समेत विद्यार्थीहरूसँगै सिर्जनात्मक शैलीमा सहभागिता जनाउँदै सकारात्मक सामाजिक सन्देश प्रवाह गरेका थिए ।

विद्यालयका अनुसार यस्ता कार्यक्रमले विद्यार्थीमा सहअस्तित्व, पारस्परिक सम्मान र सामाजिक उत्तरदायित्वको भावना विकास गर्न मद्दत पुग्ने विश्वास लिइएको छ ।