काठमाडौं  ।  फागुन २१ गते सम्पन्न प्रतिनिधिसभा सदस्य निर्वाचनको प्रत्यक्ष र समानुपातिक दुवै मत गणना सकिएसँगै रास्वपाले झन्डै दुईतिहाइ जनमत प्राप्त गरी सरकार गठनतर्फ पहिलो कदम चालेको छ। निर्वाचन आयोगका अनुसार प्रत्यक्षतर्फ १२५ सिट र समानुपातिकतर्फ ५१ लाख ४८ हजार २१७ मत पाएको रास्वपाले संसदीय अभ्यास र आन्तरिक छलफलमा जुटिसकेको छ।

पार्टी सभापति रवि लामिछाने र वरिष्ठ नेता बालेन्द्र शाहबीच नयाँ सरकार गठनका विषयमा घरायसी छलफल सुरु भइसकेको छ। लामिछानेका स्वकीय सचिव अविनाश आचार्यले भने, “सभापति खुट्टाको पुरानो संक्रमणका कारण केही दिनदेखि घरमै आराममा हुनुहुन्छ, तर त्यसबिच नेताहरूबीच लगातार छलफल भइरहेका छन्।”

रास्वपाकी सहप्रवक्ता प्रतिभा रावलले भने, “सभापतिको मुद्दाका कारण पार्टी अहिले अदालतसँग व्यस्त छ। अन्तिम मतपरिणाम हेर्न पाएको छैन, तर प्रक्रियाअनुसार सरकार गठन अघि बढ्छ।”

स्रोतका अनुसार, दुई नेताबीचको समझदारीअनुसार बालेन्द्र शाह संसदीय दलको नेता र भावी प्रधानमन्त्री हुनेछन्। पुस १३ गते लामिछाने र बालेनबीच दुईपक्षीय सहमति भइसकेको थियो।

समानुपातिक मत गणना सकिएसँगै रास्वपाले विभिन्न क्लस्टरमा तोकेर दलित, आदिवासी, खस आर्य, मधेसी, थारु र मुस्लिम वर्गका प्रतिनिधिहरूको सूची निर्वाचन आयोगमा बुझाइसकेको छ। प्रत्यक्षतर्फ १२५ सिट जितेपछि समानुपातिक आधारमा थप ५७ सिट पाउने अनुमान गरिएको छ।

हाल बालेन नेतृत्वको आगामी मन्त्रिपरिषद्को गठन, गृह मन्त्रालयसहित अन्य मन्त्रालयहरूको वितरणमा पार्टीभित्र चासो बढेको छ। लामिछानेले चुनावअघि नै तनहुँ–१ बाट निर्वाचित डा। स्वर्णिम वाग्लेलाई अर्थमन्त्री बनाउने घोषणा गरिसकेका थिए। उनका स्वकीय सचिवले भने, “प्रधानमन्त्री पहिले नै निश्चित भइसकेको कुरा हो। क्षमताको आधारमा मन्त्रीहरू चयन हुनेछ, यसमा द्विविधा छैन।”

पार्टीको नियमित प्रक्रियाअनुसार संसदीय दलको नेता चयन भएपछि राष्ट्रपति रामचन्द्र पौडेलले बालेनलाई प्रधानमन्त्री नियुक्त गर्नेछन्। प्रतिनिधिसभा सदस्य निर्वाचन ऐन, २०७४ को दफा ६२ अनुसार निर्वाचन आयोगले अन्तिम नतिजा राष्ट्रपतिसमक्ष पेश गरेपछि सरकार गठनको प्रक्रिया औपचारिक रूपमा अघि बढ्नेछ।

नेपालको संविधानको धारा ७६ बमोजिम बहुमत प्राप्त दलले सरकार गठनको पूर्ण अधिकार पाउँछ र रास्वपा बहुमतप्राप्त दलको हैसियतले आगामी सरकारको नेतृत्व गर्नेछ।