विराटनगर । विराटनगरमा राजा महेन्द्रको शालिक स्थापना गरिने भएको छ। ऐतिहासिक पहिचान र सम्पदा संरक्षण गर्ने भन्दै सनातन युवा मञ्च नेपालले शालिक बनाउने घोषणा गरेको हो ।

मञ्चले बिहीबार विराटनगरमा पत्रकार सम्मेलन गर्दै महेन्द्र चोकमा शालिक राख्ने जनाएको छ । त्यस्तै हिमालय रोडलाई पुरानै स्वरूपमा फर्काउने अभियानलाई तीव्रता दिने घोषणा गरेको छ।

विगत आठ वर्षदेखि सामाजिक र धार्मिक क्षेत्रमा सक्रिय रहँदै आएको यस संस्थाले इतिहासलाई जीवन्त राख्न राजा महेन्द्रको शालिक सहितको संरचनालाई पुनः स्थापित गर्नुपर्ने माग राखेको छ। गौरवपूर्ण इतिहास मेटिन नहुने र भावी पुस्ताका लागि पनि सम्पदाको संरक्षण अनिवार्य रहेको मञ्चले जनाएको छ।

​मञ्चका अध्यक्ष नवराज ढकालद्वारा जारी विज्ञप्तिमा यो अभियान कुनै राजनीतिक स्वार्थ नभई विशुद्ध सामाजिक र ऐतिहासिक पहिचानको रक्षाका लागि चालिएको बताए । यस कार्यलाई पूर्णता दिन सम्पूर्ण विराटनगरबासी, सामाजिक संघ–संस्था, नागरिक अभियन्ता र सरोकारवालाहरूलाई सामूहिक अपील समेत गरे। शालिक निर्माणका लागि आर्थिक सहयोग संकलनको काम शुरू भइरहेको उनले बताए ।