विराटनगर । दक्षिण भारतीय चलचित्र उद्योगका चर्चित अभिनेता जोसेफ विजय थलापति विजयले राजनीतिमा प्रवेश गरेको छोटो समयमै तमिलनाडु विधानसभा चुनावमा अप्रत्याशित प्रभाव देखाएका छन्। उनको नेतृत्वमा स्थापित तमिलागा वेट्री कडगम टीभीकेले प्रारम्भिक मतगणनामा प्रमुख दलहरूलाई पछि पार्दै नयाँ शक्ति केन्द्रको रूपमा उदाएको संकेत दिएको छ।

हालसम्मको ट्रेन्डअनुसार टीभीके १०४ सिटमा अग्रता लिँदै सत्तारुढ द्रविड मुनेत्र कडगम डीएमकेलाई स्पष्ट रूपमा पछाडि पारेको छ। मुख्यमन्त्री एमके स्टालिन नेतृत्वको डीएमके करिब ६० भन्दा बढी सिटमा सीमित देखिएको छ भने विपक्षी एआईएडीएमके पनि प्रतिस्पर्धामा उक्लिएको छ।

विजय स्वयं पेराम्बुर निर्वाचन क्षेत्रबाट आफ्ना निकटतम प्रतिस्पर्धी आरडी शेखरभन्दा करिब तीन हजार मतले अघि देखिएका छन्। चलचित्रबाट व्यापक लोकप्रियता कमाएका विजयको प्रभाव तमिलनाडु बाहिर हिन्दी भाषी क्षेत्रमा समेत फैलिएको छ।

एग्जिट पोलहरूले राम्रो प्रदर्शनको संकेत दिए पनि वास्तविक परिणाम अपेक्षाभन्दा अझै सशक्त देखिनुले राजनीतिक वृत्तमा चासो बढाएको छ।

चलचित्रदेखि राजनीति असामान्य यात्रा

बाल कलाकारका रूपमा अभिनय सुरु गरेका विजयको पूरा नाम जोसेफ विजय चन्द्रशेखर हो। उनका पिता एस.ए चन्द्रशेखर चर्चित निर्देशक र आमा शोभा गायिका हुन्। पारिवारिक पृष्ठभूमिकै कारण सानैदेखि चलचित्रमा सक्रिय भएका विजयले ‘नालैया थिरपु’ १९९२ बाट मुख्य अभिनेताका रूपमा डेब्यु गरेका थिए।

प्रारम्भिक चरणमा सामान्य व्यावसायिक चलचित्रमा सीमित देखिएका उनी समयसँगै ‘मास हिरो’का रूपमा स्थापित भए। ‘गिल्ली’, ‘कथी’, ‘थेरी’, ‘मेर्सल’ र ‘बिगिल’ जस्ता चलचित्रहरूले उनलाई दक्षिण भारतीय सिनेमाको शीर्ष स्थानमा पुर्‍याए।

सिनेमा त्याग, सत्ता लक्ष्य

राजनीतिमा पूर्णकालीन रूपमा सक्रिय हुन विजयले आफ्नो सफल अभिनय करिअर त्याग्ने घोषणा गरिसकेका छन्। ‘थलापति ६९’ लाई अन्तिम चलचित्र बनाउने निर्णयसँगै उनले आफूलाई समाजसेवामा समर्पित गर्ने बताएका छन्।

हालको चुनावी ट्रेन्डले निरन्तरता पाएमा विजय तमिलनाडुको सत्तामा नयाँ अध्याय लेख्ने नेताका रूपमा उदाउन सक्ने विश्लेषण भइरहेको छ।