विराटनगर / श्रम ऐनअनुसारको नियुक्ति र सेवासुविधाको माग गर्दै मोरङको रंगेली नगरपालिकास्थित चण्डिका डिस्टिलरीका श्रमिक आन्दोलनमा उत्रिएका छन् ।
उनीहरुले उद्योगको कामकाज ठप्प पारी एक हप्तायता मुख्य प्रदेशद्वारमा धर्ना दिंदै आएका छन् । उद्योगका श्रमिकहरु कामकाज ठप्प गरी उद्योगको मुख्य प्रवेशद्वारमा पाल टाँगेर धर्नामा बसेका छन् । मदिरा उत्पादन गर्ने सो उद्योगका कतिपय कर्मचारी १५ वर्षदेखि काम गर्दै आए पनि नियमानुसारको नियुक्ति र सेवासुविधा नपाएको भन्दै उनीहरु आन्दोलनमा उत्रिएका हुन् । श्रम ऐनले तोकेबमोजिमको सेवासुविधा पाउनुपर्ने माग गर्दै उद्योग प्रशासन र श्रम कार्यालयसम्म धाएर लामो समयदेखि प्रयास गर्दै आए पनि कुनै सुनवाई नभएपछि बाध्य भएर आफूहरु उद्योग बन्द गरी धर्नामा बस्नुपरेको उद्योगमा कार्यरत श्रमिकहरुले बताएका छन् ।
पासपोर्ट ब्राण्ड लगायतका सिलप्याक मदिरा र विभिन्न प्रकारका स्प्रिट उत्पादन गर्ने उद्योगमा हाल ५५ जना श्रमिक कार्यरत रहेकोमा ३४ जना नियमित छन् भने २१ जनालाई उद्योगले वर्षौंदेखि समयगत रुपमा काममा लगाउँदै आएको श्रमिकहरुले बताएका छन् । एकै प्रकृतिको काम गर्ने श्रमिकहरुबीच तलबभत्ता र सेवासुविधा दिने विषयमा समेत उद्योगले भेदभाव गर्ने गरेको श्रमिकहरुले आरोप लगाएका छन् ।