विराटनगर । कोशी प्रदेशको पर्यटन विकासमा केन्द्रित रहेर कोशी प्रदेश सरकारले पर्यटन विज्ञसँग छलफल गरेको छ । सन् १९८६ देखि पश्चिम नेपालको स्याङ्जास्थित सिरुबारीदेखि गाउँपर्यटन भिलेज टुरिजममा काम गरिरहेको स्वाथी संस्थाको निमन्त्रणामा नेपाल आएका अष्ट्रेलियाका पर्यटन व्यवसायी टोनी पाल र पर्यटन बोर्डका पूर्व काबा कार्यकारी निर्देशक सुवास निरौलासँग प्रदेश सरकारले छलफल गरेको हो ।

प्रचुर सम्भावना भएर पनि कोशी प्रदेशले पर्यटनबाट फाइदा लिन नसकिरहेका बेला प्रदेश सरकारले पर्यटन विज्ञहरुसँग छलफल गरेको हो । कोशी प्रदेशको आर्थिक विकास र समृद्धिमा पर्यटन क्षेत्रको महत्वपूर्ण भूमिका रहने भएकाले प्रदेश सरकारले पर्यटन क्षेत्रलाई उच्च प्राथमिकतमा राखेर काम गरिरहेको मुख्यमन्त्री हिम्मतकुमार कार्कीले बताए । छलफलमा उनले ‘प्रदेश पर्यटन वर्ष–२०८२’ मनाइरहेको जानकारी दिए ।

पर्यटनमन्त्री सदानन्द मण्डलले पर्यटन वर्षलाई थप सार्थक र प्रभावकारी बनाउन मन्त्रालयले काम गरिरहेको सुनाए । उनले कोशी प्रदेश प्राकृतिक, धार्मिक र सांस्कृतिक पर्यटनका लागि प्रचुर सम्भावना रहेको बताए । उनले बढीभन्दा बढी पर्यटक भित्र्याउन योजनाबद्ध रुपमा काम गरिरहेको दाबी गरे ।

कोशीको पर्यटनलाई कसरी अगाडि बढाउन सकिन्छ साथै पर्यटन वर्षमा अझ के–के गर्न सकिन्छ भन्ने बारे पर्यटन विज्ञहरुसित छलफल गरिएको प्रदेश पर्यटन वर्ष–२०८२ का सहसंयोजक भविसकुमार श्रेष्ठले जानकारी दिए । छलफल तथा भेटघाटमा कृष्ण शाह, पर्यटन सचिव इन्द्र सापकोटालगायतको समेत उपस्थिति रहेको थियो ।