विराटनगर । विराटनगर महानगरपालिकाको राजस्व संकलनमा गत भदौ २३ र २४ गते भएको जेनजी आन्दोलनको प्रत्यक्ष असर देखिएको छ । चालु आर्थिक वर्षको साउनदेखि कात्तिक मसान्तसम्मको राजस्व संकलनको तथ्यांक हेर्दा निराशाजनक देखिएको छ ।

चालु आर्थिक वर्षको चार महिनामा महानगरले १४ करोड २७ लाख ५४ हजार मात्रै आन्तरिक आम्दानी गर्न सकेको छ । यस अवधिमा महानगरले २२ करोड राजस्व उठाउने लक्ष्य राखेको थियो । तर लक्ष्यभन्दा झण्डै ८ करोड कम राजस्व असुल गरेको छ । गत आवको यही अवधिमा महानगरले १७ करोड ९५ लाख ८८ हजार ७२२ रुपैयाँ राजस्व संकलन गरेको थियो । चालु आर्थिक वर्षको राजस्व संकलन गत आवको भन्दा करिब ३ करोडले कमी हो । गत आवमा यस अवधिमा महानगरले २१ करोड राजस्व संकलनको लक्ष्य राखेको थियो ।

गत आवभन्दा राजस्व असुली घट्नुमा जेनजी आन्दोलनको असर भएको महानगरको राजस्व व्यवस्थापन महाशाखाका प्रमुख सरोज गौतम बताउँछन् । उनका अनुसार करदाताहरू नै अन्यौलमा रहेका छन् । ‘राजस्व असुलीमा कमी आउनुमा आन्दोलनकै असर हो भन्न सकिन्छ,’ गौतमले भने, ‘आन्दोलन नभएको भए लक्ष्य भेट्टाउने सम्भावना थियो । किनभने समयमै कर तिर्नुपर्छ भन्ने सचेतना करदाताहरूमा विगतमा भन्दा जागृत हुँदै गएको छ ।’

सम्पत्ति कर, भूमिकर, मालपोत, बहाल कर, बहाल बिटौरी कर, सवार साधन कर साना सवारी, पूर्वाधार सेवाको उपयोगमा लाग्ने कर, व्यवसाय भुक्तानी गर्ने, अखेटोपहारमा लाग्ने कर, अन्य कर, विद्युत सेवा शुल्क, न्यायिक दस्तुर, अन्य प्रशासनिक सेवा शुल्क, पार्किङ शुल्क, नक्सापास दस्तुर, सिफारिस दस्तुर, व्यक्तिगत घटना दर्ता दस्तुर, नाता प्रमाणित दस्तुर, प्रशासनिक दण्ड, जरिवाना र जफत, प्रदूषण नियन्त्रण शुल्क, व्यवसाय करलगायत विभिन्न शीर्षकबाट महानगरले राजस्व असुली गर्दै आएको छ ।

महानगरले चालु आर्थिक वर्षको साउन–कात्तिक मसान्तसम्म आन्तरिकसहित, संघीय सरकार, प्रदेश सरकार, राजस्व बाँडफाँडबाट कुल ७९ करोड ७७ लाख ७९ हजार आम्दानी गरेको छ । जसमध्ये आन्तरिकतर्फ १४ करोड, २७ लाख ५४ हजार, संघीय सरकारतर्फ ३५ करोड ३५ लाख ७० हजार, प्रदेश सरकारतर्फ २ करोड ३० लाख ३८ हजार, राजस्व बाँडफाँडबाट १२ करोड ८५ लाख १५ हजार र नगद मौज्दात १४ करोड ९९ लाख २ हजार रहेको छ ।

यसै अवधिमा ४१ करोड ३३ लाख ६१ हजार खर्च भएको आर्थिक प्रशासन महाशाखा प्रमुख संजीव भट्टराईले जानकारी दिए । भट्टराईका अनुसार जसमध्ये चालुतर्फ ३४ करोड ७३ लाख ६१ हजार र पुँजीगततर्फ ६ करोड ५९ लाख ९९ हजार ८ सय खर्च भएको छ ।

महानगरले चालु आर्थिक वर्षका लागि ४ अर्ब ४० करोडको बजेट ल्याएको छ । जसमध्ये १ अर्ब ४० करोड आन्तरिक स्रोतबाट संकलन गर्ने लक्ष्य राखिएको छ । गत आवमा महानगरले १ अर्ब १० करोड लक्ष्य राखेकोमा ६२ करोड ८५ लाख ४९ हजार ९ सय रुपैयाँ आन्तरिक आम्दानी गरेको थियो ।

मेयर नागेश कोइरालाले विराटनगर महानगरमा मात्रै नभएर सबै क्षेत्रमा आन्दोलनको असर परेकाले निराश हुनुपर्ने अवस्था नरहेको बताए । उनले अझै ८ महिना बाँकी रहेकाले लक्ष्य हासिल हुने विश्वास व्यक्त गरे ।

यसैबीच, महानगरले चालु आर्थिक वर्ष २०८२÷०८३ को पहिलो त्रैमासिक समीक्षा गोष्ठी टेन्टभित्रै सञ्चालन गरेको छ । मेयर नागेश कोइराला, उपमेयर शिल्पा निराला कार्की, प्रमुख प्रशासकीय अधिकृत योगेन्द्र दुलालको उपस्थितिमा भएको गोष्ठीमा चालु आर्थिक वर्षको तीन महिनाको अवधिमा महानगरबाट भएका कार्यप्रगति प्रस्तुत गरिएको थियो ।

कार्यक्रममा राजस्व व्यवस्थापन महाशाखा प्रमुख सरोज गौतम, आर्थिक विकास महाशाखा प्रमुख प्रतीक गड्तौला, स्वास्थ्य महाशाखा प्रमुख डा। दिलीपकुमार यादव, भौतिक पूर्वाधार महाशाखाका प्रमुख अर्जुन थापा, आर्थिक प्रशासन महाशाखाका प्रमुख संजीव भट्टराई, शैक्षिक प्रशासन महाशाखाका अधिकृत रमेश ढुंगाना, कानुन शाखाकी प्रमुख शारदा थपलियाले आ–आफ्ना शाखा र महाशाखाले गरेका कामको विवरण प्रस्तुत गरेका थिए ।

त्यस्तै सामाजिक विकास महाशाखाकी प्रमुख मञ्जु लोहनी, भण्डारण शाखा प्रमुख अजय साह, विपद तथा वातावरण शाखा र सूचना शाखाकी प्रमुख कमला निरौला, नगर प्रहरीका प्रमुख राजन पौडेललगायतले पनि आफ्नो महाशाखा र शाखाले साउनदेखि असोज मसान्तसम्म गरेका कार्यप्रगति प्रस्तुत गरेको सामान्य प्रशासन महाशाखा प्रमुख अर्जुन थपलियाले जानकारी दिए ।

जेनजी आन्दोलनका क्रममा महानगरको प्रशासनिक भवनसहित वडा नम्बर १ देखि १२ र १९ नम्बर वडामा आगजनी गरिएको थियो । जसका कारण सेवा प्रवाहमा समस्या देखिँदै आएको छ । स्थान अभावकै कारण महानगरले समीक्षा गोष्ठी टेन्टभित्र आयोजना गरेको छ ।