विराटनगर । नेपाली कांग्रेसका वरिष्ठ नेता डा. शेखर कोइरालाले बाराको सिमरामा उत्पन्न तनावप्रति गम्भीर चिन्ता व्यक्त गरेका छन् । उनले आसन्न आमनिर्वाचनलाई लक्षित गर्दै बढ्दो राजनीतिक संवेदनशीलताबीच सबै पक्ष संयमित रहनुपर्नेमा जोड दिएका छन् ।

कोइरालाले बिहीबार सामाजिक सञ्जालमार्फत सार्वजनिक गरेको अभिव्यक्तिमा संविधानको संरक्षण र निर्वाचनको सफल व्यवस्थापन सबै राजनीतिक शक्तिको साझा जिम्मेवारी भएको उल्लेख गरेका छन् । उनका अनुसार सिमरामा बुधबार देखिएको तनावले संवैधानिक प्रक्रिया र निर्वाचन दुवैमा प्रतिकूल असर पर्न सक्ने जोखिम बढाएको छ।

‘हिजो सिमरामा भएको घटना दुःखद छ । यस्तो गतिविधिले निर्वाचनको वातावरणमा खलल पुर्‍याउन सक्छ,’ कोइरालाले भने, ‘सर्वपक्षीय संयम आवश्यक छ । निर्वाचनलाई विवादरहित र मर्यादित बनाउनु नै अहिलेको प्राथमिकता हो ।’

बुधबार सिमरा क्षेत्रमा एमाले नेता महेश बस्नेतविरुद्ध जेनजी समूहले प्रदर्शन गरेपछि उत्पन्न भिडन्तका कारण वातावरण तनावग्रस्त बनेको थियो। कोइरालाले यस्तो घटनाले राजनीतिक ध्रुवीकरण बढाउने भएकाले संवाद र संयममार्फत मतभेद समाधान गर्नुपर्नेमा जोड दिएका छन्।

उनले सबै राजनीतिक पार्टी, समर्थक समूह र स्थानीयवासीलाई शान्त वातावरण कायम राख्दै निर्वाचन प्रक्रियालाई अवरोध नपुग्ने व्यवहारिक कदम चाल्न आग्रह गरेका छन् ।