विराटनगर / विराटनगरका उद्योगी एवं समाजसेवी दीनबन्धु गोयलले विपन्न समुदायका १ सय २७ विद्यार्थीलाई न्यानो कपडासहित पोशाक वितरण गरेका छन् ।
गोयलले आफ्ना दाजु स्वर्गीय ओमप्रकाश गोयलको स्मृतिमा विराटनगर–१९ धनपुराको खदराटोलस्थित जागृति आधारभूत विद्यालयमा अध्ययनरत विपन्न समुदायका विद्यार्थीहरूलाई न्यानो लुगा र पोशाक वितरण गरेका हुन् । स्कुल परिसरमा बिहीबार आयोजित कार्यक्रमका बीच गोयलले विद्यार्थीहरूलाई स्वीटर, जुत्तामोजा, स्कुलको पोशाक तथा बिस्कुट वितरण गरेका थिए । नारी विकास संघको समन्वयमा आयोजना गरिएको कार्यक्रमका बीच समाजसेवी गोयलका साथै नारी विकास संघकी अध्यक्ष सीता शर्मा र नेपाल पत्रकार महासंघ मोरङका अध्यक्ष संजीव खनालले विद्यार्थीहरूलाई पोशाकसहितका सामग्री वितरण गरेका थिए ।
विद्यालयमा अधिकांश राजवंशी र ऋषिदेव समुदायका विद्यार्थीहरू अध्ययनरत रहेको विद्यालयका प्रधानाध्यापक दधिराम नेपालले जानकारी दिए । एममुष्ठ न्यानो लुगासहित विद्यालयको पोशाक र जुत्तालगायतका सामग्रीहरू उपलब्ध गराइएपछि विद्यार्थी र अभिभावकलाई ठूलो राहत पुगेको उनले बताए । समाजसेवी गोयलले आफूले आफ्ना दाजुबाट नै समाजसेवाको प्रेरणा प्राप्त गरेको बताउँदैै विपन्नताका कारण पछि परेका समुदायलाई सबैले सहयोग गरेर मुलधारमा ल्याउनुपर्ने विचार व्यक्त गरे ।
समाजसेवी गोयलले झापा, मोरङ, सुनसरीका विभिन्न सामुदायिक विद्यालयमा अध्ययनरत आर्थिक रुपले विपन्न समुदायका बालबालिकालाई बर्सेनि पोशाक, शैक्षिक सामग्रीका साथै छात्रवृत्तिसमेत वितरण गर्दै आएका छन् । उनले विभिन्न विद्यालयमा छात्रवृत्तिसमेत प्रदान गर्दै आएका छन् ।