काठमाडौं । अमेरिकाले भेनेजुएलामा सैन्य कारबाही गरी राष्ट्रपति निकोलस मादुरोलाई नियन्त्रणमा लिएर न्यूयोर्क पुर्‍याएको जनाएको छ। नयाँ सरकार गठन नभएसम्म भेनेजुएलाको प्रशासनिक जिम्मेवारी अमेरिकाले सम्हाल्ने अमेरिकी राष्ट्रपति डोनाल्ड ट्रम्पले बताएका छन्।

अमेरिकी सेनाले शनिबार राजधानी काराकाससहित प्रमुख शहरहरूमा लक्षित कारबाही गरेको र त्यस क्रममा मादुरो दम्पतीलाई अमेरिकी सेनाको विशेष इकाइ डेल्टा फोर्सले पक्राउ गरेको दाबी गरिएको छ। डेल्टा फोर्स अमेरिकाको प्रमुख आतंकवादविरोधी इकाइ मानिन्छ।

राष्ट्रपति ट्रम्पले सामाजिक सञ्जाल ‘ट्रुथ सोसल’मार्फत मादुरो नियन्त्रणमा रहेको फोटो सार्वजनिक गर्दै पक्राउको औपचारिक जानकारी दिएका हुन्। सार्वजनिक तस्बिरमा मादुरो हतकडीसहित देखिन्छन्। यसपछि फ्लोरिडास्थित निवासमा आयोजित पत्रकार सम्मेलनमा ट्रम्पले “सुरक्षित, सही र विवेकपूर्ण सत्ता हस्तान्तरण नहुन्जेल भेनेजुएलाको शासन अमेरिकाले सम्हाल्ने” स्पष्ट पारे।

न्यूयोर्कमा मुद्दा दायर हुने

अमेरिकी महान्यायाधिवक्ताको कार्यालयका अनुसार मादुरो र उनकी पत्नीविरुद्ध न्यूयोर्कको सदर्न डिस्ट्रिक्ट अदालतमा मुद्दा दायर गरिने तयारी छ। उनीहरूमाथि लागूऔषध कारोबारलाई संरक्षण दिएको आरोप लगाइएको छ।

अमेरिकी अटर्नी जनरल पामेला बन्डीले सामाजिक सञ्जाल एक्समा मादुरोमाथि अमेरिका विरुद्ध ‘नार्को–आतंकवाद’, कोकिन आयात षड्यन्त्र तथा खतरनाक हतियारसम्बन्धी अभियोग रहेको उल्लेख गरेकी छन्। उनकी पत्नीमाथि लाग्ने अभियोगबारे भने औपचारिक विवरण सार्वजनिक गरिएको छैन।

अन्तर्राष्ट्रिय प्रतिक्रिया

अमेरिकी कारबाहीको रूस, चीन र कोलम्बियासहितका देशहरूले निन्दा गरेका छन्। रूसी विदेश मन्त्रालयले विज्ञप्ति जारी गर्दै भेनेजुएलामाथिको सशस्त्र आक्रमण गम्भीर चिन्ताको विषय भएको बताएको छ। कोलम्बियाले संयुक्त राष्ट्रसंघको चार्टरअनुसार एकपक्षीय सैन्य कारबाही अस्वीकार्य हुने धारणा व्यक्त गरेको छ।

कारबाहीबाट भएको क्षति र हताहतको आधिकारिक विवरण भने अझै सार्वजनिक भएको छैन। स्थानीय सञ्चारमाध्यमका अनुसार केही स्थानमा विस्फोट र धुवाँ देखिएको थियो।

भेनेजुएलाको प्रतिक्रिया

भेनेजुएलाकी उपराष्ट्रपति डेल्सी रोड्रिगेजले राष्ट्रपति मादुरो र प्रथम महिला सिलिया फ्लोरेसबारे सरकारले औपचारिक जानकारी नपाएको जनाउँदै दुवै जीवित रहेको प्रमाण माग गरेकी छन्। रक्षामन्त्री भ्लादिमिर पाद्रिनो लोपेजले देशभर सुरक्षा सतर्कता बढाइएको र विदेशी सैनिक उपस्थितिको विरोध गरिने चेतावनी दिएका छन्।

स्पेनी भाषामा जारी सन्देशमा उनले हालसम्मकै ठूलो आक्रमण भएको दाबी गर्दै राष्ट्रिय एकताको आह्वान गरे। “हामीमाथि आक्रमण भएको छ, तर हामी झुक्ने छैनौँ,” उनले भने।

अमेरिकी कदमले भेनेजुएलाको राजनीतिक र आर्थिक स्थायित्वमा थप अनिश्चितता सिर्जना गरेको विश्लेषकहरूको भनाइ छ।