विराटनगर । कोशी प्रदेशसभामा पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको पक्राउप्रति तीव्र असन्तुष्टि व्यक्त भएको छ। प्रदेशसभाका सांसदहरूले दुवै नेताको तत्काल रिहाइको माग गर्दै घटनालाई ‘राजनीतिक प्रतिशोध’को संज्ञा दिएका छन्।

भदौ २३ र २४ गतेको घटनामा दमन गरेको आरोपमा शनिबार पक्राउ परेका ओली र लेखकको विषय आइतबारको बैठकमा प्रमुख एजेन्डा बन्यो। शून्य समयमा बोल्दै विभिन्न दलका सांसदहरूले नयाँ सरकार गठन भएको २४ घण्टा नबित्दै गरिएको धरपकडले लोकतान्त्रिक अभ्यासमाथि प्रश्न उठाएको टिप्पणी गरे।

सांसदहरू डोल्मा तामाङ, सिर्जना राई, किशोरचन्द्र दुलाल, मीना श्रेष्ठ, गीतादेवी रेग्मी, खगेश्वरी पौडेल र होमबहादुर थापाले अनुसन्धानको नाममा राजनीतिक पूर्वाग्रह देखिएको आरोप लगाउँदै पक्राउ परेका नेताहरूको अविलम्ब रिहाइको माग गरे। उनीहरूले फरक विचार राख्ने नेतामाथि लक्षित कारबाहीले मुलुकलाई अस्थिरतातर्फ धकेल्ने चेतावनी पनि दिए।

उक्त घटनाको छानबिनका लागि गठित आयोगको प्रतिवेदनप्रति समेत सांसदहरूले गम्भीर आपत्ति जनाएका छन्। प्रतिवेदन पूर्वाग्रही र एकपक्षीय रहेको उनीहरूको दाबी छ।

विशेष समय लिएर बोलेका एमाले सांसद तिलकुमार मेन्याङ्बोले राजनीतिक नेतृत्वमाथिको गिरफ्तारीलाई ‘अस्वीकार्य’ भन्दै विगतमा यस्ता संवेदनशील विषयहरूलाई दलहरूले संवादमार्फत समाधान गर्दै आएको स्मरण गराए। उनले छानबिन प्रतिवेदनले परिस्थितिलाई शान्त पार्नेभन्दा थप द्वन्द्व निम्त्याउने जोखिम बढाएको टिप्पणी गरे।

प्रदेशसभामा उठेको यो आवाजले केन्द्र सरकारको पछिल्लो कदमप्रति राजनीतिक वृत्तमा बढ्दो असन्तोषलाई संकेत गरेको छ। सांसदहरूले सरकारलाई संयमता अपनाउन र संवेदनशील विषयमा संवादमार्फत निकास खोज्न आग्रह गरेका छन्।