विराटनगर । विराटनगर–८ मा अवस्थित ग्रेडेड स्कुलले शैक्षिक सत्र २०८२ को माध्यमिक शिक्षा परीक्षा एसईईमा सहभागी भएका विद्यार्थीहरूलाईऔपचारिक विदाई गरेको छ । विद्यालय परिसरमा आयोजित विशेष समारोहमार्फत कक्षा ९ का विद्यार्थीहरूले कक्षा १० का २९ जना परीक्षार्थीलाई सम्मानसहित विदाई गरेका हुन् ।

कार्यक्रममा विद्यालयका प्राचार्य प्रेमलालसिंह सुवालले विद्यार्थीहरूको शैक्षिक यात्रामा विद्यालयले खेलेको भूमिका स्मरण गर्दै आगामी दिनमा अझ उच्च लक्ष्य निर्धारण गरी अघि बढ्न आग्रह गरे । उनले विद्यार्थीहरूलाई मायाको चिनो प्रदान गर्दै उज्ज्वल भविष्यको कामना व्यक्त गरे । ‘एसईई केवल एउटा परीक्षा होइन, यो जीवनको अर्को चरणतर्फको प्रवेशद्वार हो,’ उनले भने ।

समारोहमा सांगीतिक तथा सांस्कृतिक प्रस्तुति, नृत्य, कविता वाचनलगायत विविध कार्यक्रम प्रस्तुत गरिएको थियो । विद्यालयका सेकेण्डरी प्रमुख विपिन यादवले विद्यार्थीहरूको समग्र विकासमा विद्यालय सधैं प्रतिबद्ध रहने उल्लेख गर्दै उच्च शिक्षा तथा करिअर मार्गदर्शनमा आवश्यक सहयोग निरन्तर उपलब्ध गराइने बताए । उनले भने, ‘हाम्रा विद्यार्थी जहाँ पुगे पनि विद्यालयसँगको सम्बन्ध कहिल्यै टुट्दैन, हामी सधैं उनीहरूको साथमा रहनेछौं ।’

त्यस्तै, कक्षा १० का विद्यार्थीहरू प्रशान्त कामत, रोशनी साह, रोनक कामत र स्मारिका अधिकारीले विद्यालयमा बिताएका वर्षहरूलाई जीवनकै महत्वपूर्ण समयका रूपमा स्मरण गर्दै शिक्षक तथा सहपाठीप्रति आभार व्यक्त गरे । उनीहरूले अनुशासन, परिश्रम र आत्मविश्वासलाई सफलताको मूल मन्त्रका रूपमा अघि बढाउने प्रतिबद्धता जनाए ।

कार्यक्रमले विद्यालयमा पारिवारिक वातावरण, शिक्षक–विद्यार्थीबीचको आत्मीय सम्बन्ध तथा सहकार्यको संस्कारलाई उजागर गरेको सहभागीहरूको भनाइ थियो। एसईईपछि विद्यार्थीहरू उच्च शिक्षा, प्राविधिक अध्ययन तथा विविध पेशागत यात्रातर्फ अग्रसर हुने तयारीमा रहेका छन्।