विराटनगर । मोफसलकै प्रतिष्ठित फुटबल प्रतियोगिता विराट गोल्डकप अन्तर्गत आज दोस्रो सेमिफाइनल खेल हुँदैछ । घरेलु टोली सम्राट स्पोट्र्स क्लब र चर्च ब्वाइज युनाइटेडबीच हुने यो प्रतिस्पर्धाले फाइनलको यात्रा तय गर्ने टोलीको टुंगो लगाउनेछ ।

यसअघि बुधबार सम्पन्न पहिलो सेमिफाइनलमा झापा ११ ले विभागीय टोली नेपाल पुलिस क्लब लाई १–० गोल अन्तरले पराजित गर्दै फाइनलमा स्थान सुरक्षित गरिसकेको छ । झापा ११ ले संयमित खेल प्रदर्शन गर्दै निर्णायक गोलमार्फत पुलिसलाई स्तब्ध पार्दै उपाधि नजिक पुगेको हो ।

अब झापा ११ ले आज हुने सम्राट स्पोट्र्स क्लब र चर्च ब्वाइज युनाइटेड बीचको विजेतासँग उपाधिका लागि प्रतिस्पर्धा गर्नेछ । प्रतियोगितामा दुबै टोली उत्कृष्ट लयमा रहेकाले आजको खेल निकै प्रतिस्पर्धात्मक हुने अपेक्षा गरिएको छ ।

चर्च ब्वाइज युनाइटेडले क्वार्टरफाइनलमा विभागीय टोली एपीएफ क्लब लाई १–० ले हराउँदै अन्तिम चारमा स्थान बनाएको थियो । सन्तुलित डिफेन्स र तीव्र काउन्टर अट्याकका कारण चर्च ब्वाइज यस प्रतियोगितामा बलियो दाबेदारका रूपमा उभिएको छ ।

यता, घरेलु समर्थकको साथ पाएको सम्राट स्पोट्र्स क्लबले भारतको बिरसामुण्डा स्पोट्र्स एकेडेमीलाई ३–१ ले पराजित गर्दै सेमिफाइनल यात्रा तय गरेको हो । आक्रामक खेलशैली र गोल गर्ने क्षमताका कारण सम्राट पनि फाइनल प्रवेशका लागि उत्तिकै बलियो देखिएको छ ।

दुबै टोलीबीचको भिडन्त केवल फाइनल पुग्ने प्रतिस्पर्धा मात्र नभई प्रतिष्ठा र दबदबाको लडाइँसमेत बन्ने देखिएको छ । घरेलु मैदानको फाइदा सम्राटलाई भए पनि चर्च ब्वाइजको अनुभव र रणनीतिक खेलले खेललाई खुला बनाउने अनुमान गरिएको छ ।

प्रतियोगिताको विजेताले ११ लाख रुपैयाँ नगद पुरस्कार प्राप्त गर्नेछ भने उपविजेताले ५ लाख रुपैयाँमा चित्त बुझाउनुपर्नेछ । उच्च पुरस्कार राशिसहित सञ्चालन भइरहेको प्रतियोगिताले नेपाली फुटबलमा नयाँ उत्साह थपेको आयोजकको दाबी छ ।

अब सबैको ध्यान आजको दोस्रो सेमिफाइनलतर्फ केन्द्रित भएको छ—झापा ११ को सम्भावित प्रतिद्वन्द्वी को बन्ने भन्ने चासोले दर्शक र समर्थकबीच थप रोमाञ्च सिर्जना गरेको छ ।