काठमाडौं । अमेरिकाको लुइसियाना राज्यस्थित श्रेभपोर्ट सहरमा घरेलु विवादले भयावह रूप लिँदा एक व्यक्तिले आठ बालबालिकाको गोली हानी हत्या गरेका छन्। घटनालाई यस वर्ष अमेरिकामा भएका सबैभन्दा भीषण सामूहिक गोलीकाण्डमध्ये एक मानिएको छ।

स्थानीय समयानुसार आइतबार बिहान करिब ६ बजे वेस्ट ७९औँ स्ट्रिटको ३०० ब्लकमा भएको उक्त घटनामा ३१ वर्षीय शमार एल्किन्स संलग्न रहेको अन्तर्राष्ट्रिय सञ्चारमाध्यमहरूले जनाएका छन्। घटनामा मारिएका आठमध्ये सात बालबालिका उनकै आफ्नै सन्तान रहेको प्रारम्भिक अनुसन्धानबाट खुलेको छ।

प्रहरीका अनुसार एल्किन्सले आफ्नै निवासभित्र रहेका बालबालिकामाथि अन्धाधुन्ध गोली प्रहार गरेका थिए। ज्यान जोगाउन भागेका एक बालकलाई घरको छतसम्म पुगेपछि पनि गोली हानिएको थियो। आक्रमणमा असल्ट–स्टाइल हतियार प्रयोग गरिएको जनाइएको छ।

मृत्यु हुनेमा तीन वर्षदेखि ११ वर्ष उमेर समूहका आठ बालबालिका रहेका छन्। उनीहरूमध्ये सातजना सहोदर दाजुभाइ–दिदीबहिनीका सन्तान हुन् भने एक जना आफन्तको छोरा रहेको प्रहरीले पुष्टि गरेको छ।

घटनामा एक १३ वर्षीय बालक गम्भीर घाइते भएका छन्। उनले आक्रमणबाट बच्न घरबाट भाग्ने क्रममा छतबाट हाम फालेका थिए। उनको अवस्था उपचाररत रहेको बताइएको छ।

यसैबीच, आरोपितले बालबालिकामाथि आक्रमण गर्नु अघि आफ्नी श्रीमतीलाई गोली हानेका थिए। गम्भीर घाइते अवस्थामा रहेकी उनलाई उपचारका लागि अस्पताल लगिएको छ। त्यसपछि उनी अर्को घरमा प्रवेश गरी थप बालबालिका र एक महिलामाथि गोली चलाएको प्रहरीले जनाएको छ। ती महिला पनि गम्भीर घाइते अवस्थामा उपचाररत छिन्।

प्रहरीले घटनालाई घरेलु विवादसँग जोडेर अनुसन्धान अघि बढाएको जनाएको छ। घटनापछि स्थानीय समुदाय त्रसित बनेको छ भने सुरक्षाकर्मीहरूले थप अनुसन्धान तीव्र पारेका छन्।