विराटनगर । महाकवि लक्ष्मीप्रसाद देवकाटाको चर्चित खण्डकाव्य हो– ‘मुनामदन’ । सर्वाधिक बिक्री हुने नेपाली साहित्यिक पुस्तकको रूपमा यसको भिन्न स्थान छ । तिब्बतको ल्हासासँग नेपाली समाजको आर्थिक सम्बन्ध बलियो भएको समयको यो अमर दस्तावेज हो।

झ्याउरे लयमा बुनिएको वियोगान्त प्रेमकथा यति बेला नाटकको रूपमा मंचन भइरहेको छ । विराटनगरस्थित आरोहण गुरुकुलमा असोज ४ गतेबाट उक्त नाटकको नियमित मञ्चन सुरु भएको छ । विराट आदर्श साहित्य मञ्चले नाटकलाई मञ्चन गरेको हो ।

झ्याउरे लय टिपेर लेखिएको खण्डकाव्यको नाट्य रूपान्तरणले दर्शकको मन छुन्छ । दर्शकहरु नाटक हेर्दै गर्दा भावुक हुन्छन् । नाटकले दर्शकलाई पुरानो समाजमा लैजान्छ । चरम गरिबीका कारण घर चलाउन धौधौ भएपछि पत्नी मुना र आमालाई छोडेर मदन पैसा कमाउन ल्हासा जान्छन । बाटोमा फर्किने क्रममा झाडापखाला लागेर मदन थला पर्छ । बिरामी मदनलाई बीच बाटोमै छोडेर साथीहरू घर फर्किन्छन् र घरमा आमा र मुनालाई मदनको निधन भएको खबर सुनाइदिन्छन् । यो कुराले मुना शोकमा पर्छिन् र उनको निधन हुन्छ । उता बिरामी परेको मदनलाई एक तिब्बतीले स्याहार गरी बचाउँछन । निको भएर घर फर्किएपछि न मदनले मुनालाई भेट्छ, न आमालाई । उनकी दिदीले यसको बेलीविस्तार लगाउँछिन् ।

‘मुनामदन’ विछोडको कथा मात्रै हैन, यो आदर्श प्रेमकथा पनि हो । अहिले पनि नेपाली समाजमा निम्न वर्गीय परिवारको कथा उस्तै छ । स्थान र आवश्यकताका प्रकृतिहरू बदिलएका छन् । अहिलेका मदनहरू ल्हासाका सट्टा कतार मलेसिया जान्छन् ।

कटवाल दिपकको नाट्य रुपान्तरण तथा निदेर्शन रहेको ‘मुनामदन’ लाई निम्नमध्यम वर्गीय परिवारको प्रतिनिधिमूलक नाटक मान्न सकिन्छ । मदनलाई साथीहरूले अलपत्र पारेर छोडेको दृश्य, जातभात छाडेर भोटे तिब्बतीको खुट्टा समाउँदाका दृश्यहरूले दर्शकलाई भावुक बनाउँछन् ।

नाटकलाइ विराटनगरका विद्यालयहरु तथा दर्शकहरुले मन पराएर राम्रो साथ दिएका कारण आफु सफल भएको कटवाल दिपकले बताए, ‘मुनामदन’  आफैमा एउटा उत्कृष्ट कृती भएका कारण हरेक विद्यार्थी तथा दर्शकहरुलाइ वुझाउन मंचन गरेको उनले बताए ।

नाटकले देवकोटाको खण्डकाब्यलाइ न्याय गरेको र कलाकारहरुको अभिनयले हरेक मान्छेको मन छुने शिक्षासेवी भेषराज पोखरेलले बताए । साथै नाटकले अहिलेको जन जिवन संग मिल्लोजुल्दो समस्याको उठान गरेको र अहिले पनी नेपालीहरु विदेशिन बाध्य भइरहेकाले हरेक नेपालीहरुले सोच्नुपर्नै अवस्था आएको र यस्तो अवस्था परिवर्तन गर्न राज्यले कदम चाल्नुपर्ने प्रतिनिधीसभा सदस्य माननिय योगेन्द्र मण्डलले बताए ।

नाटकमा रस्मी थापा लकेश दंगाल, मिलन चाम्लिङ राइ,निर्जल पौडेल, अतित निरौला, सुजता थापा, प्रदिप दाहाल, दिवस ढकाल, एलिजा ठाकुर, आकृती थापा, लिलामायाँ लिम्बु, सचिा लिम्बु, मनिला तामाङ, अभिनय रहेको छ । नाटकको प्रकासमा सागर विश्वास र संगितमा सागर विष्ट रहेका छन् ।

नाटक असोज १६ गते सम्म हरेक दिन विहान ८ बजे दिउँशो १२ बजे र २ बजे मंचन भइरहेको छ ।