विराटनगर । मोरङको रंगेली नगरपालिका–२ स्थित बेतौनामा नक्कली नेपाली रुपैयाँ चलाएको आरोपमा दुई जना पक्राउ परेका छन् । पक्राउ पर्नेमा ४५ वर्षीय सहमद हुसेन र ४३ वर्षीय महेन्द्र मेहता रहेका छन् ।

प्रहरीका अनुसार हुसेनले माघ १३ गते साँझ करिब ८ बजे बेतौनास्थित एक डिस्टिलरी पसलमा रेडबुल खरिद गर्दा एक हजारको नक्कली नोट दिएका थिए । त्यसलगत्तै उनले उज्जल ढकालको किराना पसलमा उधारो तिर्न अर्को हजारको नक्कली नोट प्रयोग गरेका थिए । नोट कागजजस्तो देखिएपछि दुवै पसलेलाई शंका लागेर प्रहरीलाई जानकारी गराइएको थियो ।

मोरङ प्रहरी नायव उपरीक्षक हरिनन्दन चौधरीका अनुसार प्रारम्भिक अनुसन्धानका क्रममा हुसेनले चलाउँदै आएको प्रदेश १–०१–००४ ह ०६३७ नम्बरको सिटी सफारीको सिटमुनि थप पाँच थान नक्कली नोट फेला परेको थियो । त्यसपछि हुसेनको बयानका आधारमा रंगेली–२ कमलझोडास्थित महेन्द्र मेहताको घरमा खानतलासी गर्दा थप नक्कली नोट बरामद भएको प्रहरीले जनाएको छ ।

दुवै जनाको साथबाट जम्मा नौ हजार रुपैयाँ बराबरका नक्कली नेपाली नोट बरामद गरिएको र घटनाबारे इलाका प्रहरी कार्यालय रंगेलीले थप अनुसन्धान गरिरहेको डीएसपी चौधरीले बताए ।

सीमावर्ती जिल्ला मोरङमा पछिल्लो समय नक्कली नोटका घटना बढ्न थालेका छन् । यसअघि काठमाडौँमा जुत्ता खरिदको क्रममा फेक करेन्सीको सञ्जालसम्म प्रहरी पुगेको थियो । सो घटनामा नेपाल–भारत सीमापारबाट नक्कली नोट छापेर पठाउने समूहका मुख्य योजनाकार रविकुमार श्रीवास्तव पक्राउ परेका थिए । उनले करिब ९ लाख रुपैयाँ बराबरका नक्कली नेपाली नोट बजारमा पठाइसकेको बयान प्रहरीसमक्ष दिएका छन् ।