विराटनगर । विराटनगरमा यसै शैक्षिक सत्रदेखि सञ्चालनमा आएको मार्टस मेमोरियल प्लस टुले नयाँ भर्ना भएका विद्यार्थीहरूका लागि स्वागत तथा अभिमुखीकरण कार्यक्रम सम्पन्न गरेको छ। विराटनगरस्थित सिटी पार्टी प्यालेसमा आज आइतबार आयोजित विशेष समारोहका बीच विद्यार्थीहरूलाई स्वागत गर्दै कलेजको शैक्षिक पद्धतिका बारेमा अभिमुखिकरण गराएको हो ।

यसै वर्षदेखि सञ्चालनमा आएको यस कलेजमा पहिलो वर्षमै विज्ञान, व्यवस्थापन र होटल म्यानेजमेन्ट संकायमा गरी ७ सय ३७ जना विद्यार्थी भर्ना भएका छन्। कार्यक्रमलाई सम्बोधन गर्दै कलेजका प्रिन्सिपल सीएम श्रेष्ठले अभिभावकहरुको विश्वासलाई आत्मासात गर्दै दुई बर्षमा विद्यार्थीहरुले उत्कृष्ट नतिजा ल्याउन सक्ने योग्य बनाउने बताएका छन् ।

प्रिन्सिपल श्रेष्ठले भने, ‘मार्टस प्लस टुमा शिक्षा क्षेत्रका ३१ जना अनुभवी शैक्षिक अभियन्ताहरू आबद्ध हुनुहुन्छ, जसमा एक दर्जनभन्दा बढी विभिन्न स्कुलका प्रिन्सिपलहरू रहनुभएको छ। यति ठूलो र अनुभवी टोलीको साथ रहेकाले यहाँ अध्ययन गर्ने विद्यार्थीहरूको भविष्य सुरक्षित छ। हामी विद्यार्थीको सपना साकार पार्न दिनरात खट्न तयार छौं।’

कार्यक्रममा कलेजका संस्थापक अर्जुन श्रेष्ठले मार्टस मेमोरियलले विद्यार्थीहरूलाई केवल किताबी ज्ञान मात्र नभई सीप, संस्कार र प्रविधियुक्त शिक्षा दिएर प्रतिस्पर्धी बनाउने बताए ।

समारोहमा शुभकामना मन्तव्य राख्दै प्याब्सन कोशी प्रदेशका कोषाध्यक्ष प्रेमलाल सिंह सुवाल, प्याब्सन मोरङका अध्यक्ष जगतबहादुर बस्नेत र वरिष्ठ उपाध्यक्ष मोहन बुढाथोकी लगायतले कलेजको सफलताको कामना गरे ।

विष्णु डंगोलको अध्यक्षतामा सम्पन्न उक्त कार्यक्रमको सञ्चालन संस्थापक इन्द्र कुमार राईले गरेका थिए । कार्यक्रममा विद्यार्थीहरूले विभिन्न नृत्य र गायन प्रस्तुत गरी दिनभर रौनक थपेका थिए।